ხანძარია შიდა ქართლში. ხაშურის მუნიციპალიტეტის ტერიტორიაზე, სურამიდან დაახლოებით 10 კილომეტრში (ცოცხნარას თემში), სოფელ ცედანთან ახლოს ცეცხლი ფოთლოვან ტყეში გაჩნდა.
ამ დროისთვის არსებული ინფორმაციით, ხანძარი, დაახლოებით, 10 ჰა. ფართობზეა გავრცელებული. სიბნელის მიუხედავად, ხანძრის სალიკვიდაციო სამუშაოები ინტენსიურ რეჟიმში მიმდინარეობს.
შემთხვევის ადგილზე იმყოფებიან შიდა ქართლის გუბერნატორი გიორგი ხოჯევანიშვილი, შს სამინისტროს შიდა ქართლის პოლიციის დეპარტამენტის ხელმძღვანელი მამუკა საღარეიშვილი, სამართალდამცავები და საგანგებო სიტუაციების მართვის სამსახურის ხელმძღვანელები.
,,ცეცხლი გავრცელებულია ფოთლოვან ტყეში, წინასწარი ინფორმაციით, დაახლოებით 10 ჰა. ფართობზე. ამ ეტაპზე, ხანძრის ლოკალიზების სამუშაოებში 12 ერთეული სახანძრო მანქანა და სახანძრო სპეცტექნიკაა ჩართული. სალიკვიდაციო სამუშაოებს ართულებს რთული რელიეფი, თუმცა, ყველაფერი კეთდება იმისთვის, რომ ცეცხლის ლოკალიზება უმოკლეს დროში მოხერხდეს", - განაცხადა შიდა ქართლის გუბერნატორმა გიორგი ხოჯევანიშვილმა.
სოფელი ცედანი ხაშურის მუნიციპალიტეტში, ლიხის ქედის აღმოსავლეთ კალთაზე, ზღვის დონიდან 850 მეტრ სიმაღლეზე მდებარეობს.
შინაგან საქმეთა სამინისტრომ ხანძრის ფაქტზე გამოძიება სსკ 188-ე მუხლით დაიწყო.