ალბათ ბევრი ვერ წარმოიდგენს, რომ ციფრული სამყაროს მაგნატი, Apple-ის გენერალური დირექტორი, სტივ ჯობსი არა თანამედროვე ფეშენებელურ ვილაში, არამედ ძველებურ, სოფლის სტილის სახლში ცხოვრობდა. კალიფორნიის შტატში, ქალაქ პალო ალტოს გარეუბანში, ქუჩის ბოლოს მდებარე ეს საცხოვრებელი ჯობსმა 1990-ის წლებში შეიძინა, როცა ახალდაქორწინებული იყო. სახლი თავისი მიწის ნაკვთით 2 ათას კვადრატულ მეტრზეა განთავსებული. აქვს 7 საძინებელი, 5 სააბაზანო ოთახი. ის ბრიტანულ ქალაქგარე სახლს მოგაგონებთ და ძალიან წყნარ უბანში მდებარეობს. ნამდვილად ვერ იფიქრებთ, რომ აქ მაღალი ტექნოლოგიების სპეციალისტი ცხოვრობდა.

მოგვიანებით მისი მეუღლე იხსენებდა, თუ რა დამამშვიდებლად მოქმედებდა წყვილზე ეს სახლი. "კუთხე, სადაც სტივს უყვარდა ჯდომა, ყველაზე მყუდრო ადგილი იყო სახლში. სახლი ყველა სეზონზე განსხვავებულად გამოიყურებოდა, მაგრამ შთამაგონებელ ძალას არასოდეს კარგავდა" - იხსენებს მისი მეუღლე.