ინტერნეტმომხმარებელი ლევან ტაკაშვილი ავრცელებს პოსტს და ვიდეოს ელენე ბებოზე, რომლის ნამუშევრები არც ისე დიდი ხანია, აღაფრთოვანებს საზოგადოებას:

"დღეს ელენე ბებო მოვინახულეთ. გაუხარდა ჩვენი მისვლა. ბავშვობიდან ვიცნობ ბებოს. უზომოდ უყვარდა მამაჩემი და ჩემი ძმები. ორივენი ჩემზე ხშირად აკითხავდნენ. შეძლებისდაგვარად ეხმარებოდნენ. წამოსვლა რომ დავაპირე, მითხრა, ისე როგორ გაგიშვებთ რომ ჩემი შემოქმედება არ გაჩვენოთო. ვიდეოს ვუღებდი. მითხრა, გადაიღე, ბებო, გადაიღეო. ცხოვრობს მარტო. გული მომიკვდა, ამ სიცივეში უდგას შეშის "ფეჩი". თვითონაც ძლივს დადის, შეშის ზიდვას როგორ ახერხებს. ნუთუ თელავის მთავრობას არ გააჩნია იმდენი სახსარი, რომ გაზის გამათბობელი ედგას? ამდენ მის უნიკალურ შემოქმედებას ხომ ქალაქს და მომავალ თაობას უტოვებს? სარდაფში იმ სინესტეში აქვს თავისი სიმდიდრე.
ღმერთმა დიდხანს აცოცხლოს. მერე წავიშენთ თავში ხელებს, თურმე ვინ გვყოლია და არ ვიცოდით. დღეს ვნახე ადამიანი, რომელშიც ღმერთი ცხოვრობს. ხვალ 88 წლის ხდება. დავპირდი, მოვალ-მეთქი. იმედია მოვახერხებ."

ასევე იხილეთ ელენე ბებოზე: "ღარიბს რომ დიდი იდეები აქვს, იმან რა უნდა ქნას?"