თანამედროვე სამოსზე გაცოცხლებული ძველი ქართული ორნამენტები

ჩვენი სტუმარი ქალბატონი ნინო აბზიანიძეა, რომლის მშვენიერ ბაღს ჩვენი მკითხველი უკვე იცნობს (იხილეთ სტატია). ქუთაისის აკაკი წერეთლის უნივერსიტეტში, დიზაინის ფაკულტეტზე გრაფიკის ლექციებს კითხულობს, ამავე დროს ძველ ქართულ, ეროვნულ მოტივებზე თანამედროვე სამოსს ქმნის, ქმნის დეკორის ელემენტებს.

ქართული ეროვნული სამოსი ეთნიკური კუთხეების მიხედვით დიდი მრავალფეროვნებით გამოირჩევა. თითოეულ ეთნიკურ კუთხეს მისთვის დამახასიათებელი სამოსი ჰქონდა. ქალბატონმა ნინომ ეროვნული სამოსის შექმნა სწორედ ძველი ორნამენტების და სხვადასხვა დეტალის შესწავლით დაიწყო.


-  ძალიან საინტერესოა თანამედროვე კოსტიუმში ხევსურული ორნამენტების გამოყენება, რადგან იგი მრავალფეროვანია და ორიგინალურობით გამოირჩევა...

საახალწლო დეკორი


ყველაფერი ბავშვობაში დაიწყო.

ქსოვდა და კერავდა ფერად, თმახუჭუჭუა, ლოყებწითელა თოჯინებს და ამით ბავშვობას ულამაზებდა თანატოლებს. შემდეგ ახლობლები ეკითხებოდნენ რჩევას, როგორი ტანისამოსი შეეკერათ. დროთა განმავლობაში მიხვდა, რომ ძველი ქართული, ტრადიციული სამოსი იზიდავდა და მათი შექმნა საკუთარი ხელით გადაწყვიტა. ქალბატონი ნინოს საყვარელი ფერი ოქროსფერია, რომელიც იმედთან და სიცოცხლესთან ასოცირდება. მის ნამუშევრებში სწორედ ეს ფერი ჭარბობს. სამოსის მოსაქარგად და დასამშვენებლად მძივებს, ფერად ქვებს, ხავერდს და სხვა დეტალებს იყენებს. თითოეული ფიგურა და ორნამენტი ხელით გამოჰყავს, რომელიც საკმაოდ დიდ ძალისხმევას და შრომას საჭიროებს. მისთვის ყველაზე დიდი ბედიერება და სიამოვნებაა, როცა დასრულებულ ნამუშევარს სხვის ტანზე ხედავს. ასევე დახვეწილი და მრავალფეროვანია მისი აქსესუარები.


- ვხატავ ესკიზებს, ვაკერინებ მოდელს და შემდეგ ვიწყებ ხელით მუშაობას. თითოეულ ბისერსა და ქვაში დიდ სიყვარულს ვაქსოვ. როცა დასრულებულ ნამუშევარს ვხედავ, დიდ კმაყოფილებას და სიამოვნებას განვიცდი, თითქოს ჩემი განცდები, გრძნობები საზოგადოებამდე მივიტანე. ხელოვნება ძალიან კარგი საშუალებაა საზოგადოებასთან საკომუნიკაციოდ.



კომენტარის დამატება

მსგავსი სიახლეები